Con Dragal II. A metamorfose do dragón chega a segunda
entrega dunha triloxía -a anterior entrega fora Dragal I. A herdanza do dragón-
na que Elena Gallego Abad (Teruel, 1969), considerada xa por algúns como a
Rowling galega, continúa a historia e mais as aventuras de Hadrián, o
adolescente que, tras a morte en estrañas circunstancias de seu pai e grazas a
un medallón, descobre o seu fantástico destino: converterse no último dragón
galego.
Porén, os obstáculos son inevitables -esencialmente, nesta sorte de
novelas- e agora Hadrián debe protexerse de Dragal, que quere absorber a
materia gris do seu cerebro.A axuda de Mónica e Don Xurxo será fundamental para
o protagonista desta historia de reminiscencias medievais universais onde
dragóns, profecías, cabaleiros, catacumbas e segredos milenarios, en lugar de
existiren en mundos paralelos -sen dúbida a opción máis doada-, son trasladados
ao século XXI.
Motivos xa recorrentes na literatura xuvenil de corte fantástico,
que se actualizan en Dragal ao inserilos na tradición galega ou ao revés, de
maneira que a cultura de noso está presente en diversos aspectos que van dende
a escolla de espazos tan característicos como a Poza da Moura até a
idiosincrasia dos protagonistas.
Aventuras de adolescentes, que parten dunha
potencialidade argumental apoiada nun ritmo áxil, con valores e sentimentos
inherentes a estas entre os que cómpre salientar a amizade,o amor e o
compañeirismo, que veñen encher o interese e a demanda obxectiva de lectores
satisfeitos despois da primeira entrega desta serie.