EL CORREO GALLEGO
GEOVANA GENTILI
A escritora turolense Elena Gallego incorpora ao galego a
obra finalista do Premio Caixa Galicia de Literatura Xuvenil
Nos últimos anos, observamos a constante recorrencia ao
universo mitolóxico nas publicacións destinadas aos mozos (aquí, deixamos de
lado o aspecto fronteirizo inherente ao xénero xuvenil). Así, historias con
protagonistas bruxos, dragóns, lobishomes, vampiros e outros seres
sobrenaturais poboaron o imaxinario dese público e, como exemplos máis
recentes, podemos mencionar a saga do bruxo Harry Potter, de J. K. Rowling e a
dos vampiros, en Crepúsculo, de Stephenie Meyer.
Seguindo esa vertente, Elena Gallego Abad (Teruel, 1969)
incorpora ao sistema literario galego Dragal. A herdanza do dragón (2010), obra
finalista do IV Premio Caixa Galicia de Literatura Xuvenil 2009, que se
publicou na colección Fóra de Xogo de Edicións Xerais de Galicia, primeira entrega
dunha futura triloxía. Como o propio título suxire, a temática do libro incide
no renacemento do último dragón galego.
Nun día normal de aulas, Hadrián descobre, na fachada da
igrexa de San Pedro, a presenza dun dragón que se asemella a unha das caras
presente na medalla que herdara de seu pai. A partir dese momento, a presenza
do dragón forma parte do imaxinario do mozo estudante e as lembranzas dos
contos narrados por seu pai na súa infancia adquiren novos significados.
Hadrián xunto á súa amiga Mónica inician un proceso de investigación coa
finalidade de entender a relación existente entre os dous obxectos, buscando
máis informacións referentes ao misterioso dragón.
En consonancia coa temática, a estrutura dada ao libro é
similar á da narrativa detectivesca, na que os personaxes son os encargados de
relacionar os diferentes elementos descubertos na tentativa de cubriren as
lagoas existentes na trama.
Nese sentido, verificamos que esas "pistas" se
converten nun recurso narrativo estimulante e orientador do texto, conducindo
tanto o protagonista coma o lector ao punto máximo da historia, na que se dá o
encontro e a fusión de Hadrián co dragón nas catacumbas da igrexa de San Pedro.
A pesar da mestura identitaria, moitas preguntas permanecen abertas: "Quen é
Dragal e que quere? Quen decidiu que eu debo ser o Gran Mestre dunha orde da
que ninguén máis sabe nada? Como vai rematar todo isto?" (p. 151).
Malia que a obra de Elena Gallego Abad recorra ao
universo mitolóxico comunmente empregado nas publicacións destinadas aos mozos,
o seu discurso literario diferénciase por incorporar a ese tipo de escritura
elementos identitarios galegos.
Dese modo, o prestixio de Dragal incide no
feito de crear un universo marabilloso conforme á cultura de Galicia.
Agora
quédalle ao lectorado esperar a continuación desa triloxía e coñecer que
simboloxía do dragón será abordada nos demais volumes da saga: a da perspectiva
cristiá -da forza do mal- ou a da alquimia -do poder e da forza-.